ເມືອງຍົມ​ມະ​ລາດຕັ້ງ​ຢູ່​ທາງ​ທິດຕາ​ເວັນ​ອອກ​ສ່ຽງ​ເໜືອຂອງ​ແຂວງຄຳ​ມ່ວນ ຫ່າງ​ຈາກ​ເທດສະ​ບານແຂວງ   54 ກິ​ໂລ​ແມັດ, ມີ​​ເຂດ​ແດນ​ຕິດ​ຈອດ​ກັບ 5 ຕົວ​ເມືອງມີ ເມືອງ ທ່າແຂກ, ເມືອງ ຫີນບູນ ,ເມືອງ ມະຫາໄຊ ,ເມືອງ ບົວລະພາ, ເມືອງ ນາກາຍ ມີເນື້ອທີ່ທັງໝົດ 120.914 ​ເຮັກຕາ  ແລະ ຍັງເປັນເມືອງພື້ນຖານການປະຕິວັດ, ປະຊາຊົນບັນດາເຜົ່າມີມູນເຊື້ອອົງອາດກ້າແກ່ນ, ມີຄວາມຮັກເຊື້ອແພງຊາດ ຍອມເສຍສະຫຼະເລືອດເນື້ອເພື່ອຊາດ, ເພື່ອການປະຕິວັດຈົນໄດ້ຮັບໄຊຊະນະຢ່າງສະຫງ່າຜ່າເຜີຍ.

      ເມືອງຍົມມະລາດ ມີພົນລະ​ເມືອງ​ 33.959 ຄົນ; ຍິງ 17.107 ຄົນ, ມີ 4 ເຜົ່າຢູ່ຮ່ວມກັນ ຄື: ເຜົ່າລາວ 54%, ເຜົ່າມະກອງ 37%, ເຜົ່າຜູ້ໄທ 6% ແລະ ເຜົ່າແສກ 3% ຂອງຈຳນວນພົນລະເມືອງ, ມີ 3 ກຸ່ມບ້ານ, ມີ 46 ບ້ານ, ມີ 7.401 ຄອບຄົວ​ ແລະ 6.780 ຫຼັງຄາເຮືອນ.